للجمال عنوان لكن عنوانه ليس انا




انا عندي 20 سنة كل بنت نفسها تكون جميلة لنفسها قبل اي حد او اي حاجة ، واكيد الشكل الحلو بيدي ثقة بالنفس لأي حد مش بس للبنات ، و دي البداية. انا في الوقت الحالي مش طايقة ابص لنفسي في المراية وكارهة شكلي اوي بسبب إني بقيت شايفة نفسي وحشة جداً. انا عارفة إني احسن من غيري الحمدلله وإن شكلي الحمدلله مقبول مش وحشة للدرجة دي بس حالياً انا مش شايفة كده ابداً. من صغري عندي هالات سودا تحت عيني جامده اوي ومش بتروح خالص بأي علاج زي الكريمات وكده ، بتضايقني اسئلة الناس وهزارهم السخيف لما حد يقولي ((انتي مدمنة ولا ايه)) ، تاني حاجة بلبس نظارة من حوالي 9 سنين وشكلي بيبقى بشبع بيها بس كنت متعايشة مع الموضوع عادي ، بس من كتر تريقة الناس على شكلي بيها والكلام اللي هو ((طيب ليه مش بتعملي لينسيز)) كل ده خلاني ابطل البسها رغم إن نظري ضعيف جداً ، تالت حاجة جسمي مش متناسق مع بعضه و ده بيخليني ماعرفش البس اللي انا عايزاه حتى هدوم البيت ، رابع حاجة عندي بقع غامقة كتير في جسمي مخلياني مش طايقاه. كل الحاجات دي اكيد موجودة من زمان بس مؤخراً تعبتني نفسياً اوي وحتى بقيت احس الناس شايفاني زي ما انا شايفة نفسي بالوحاشة دي ، يمكن ده احساسي انا بس مش عارفة اتعامل مع الموضوع ازاي وارجع اقبل نفسي تاني ازاي ، نفسي اتعالج من كل ده بس ماعنديش امكانية مادية لكده وماعنديش الجرأة إني اقترح فكرة العلاج على اهلي لإني عارفة إنهم هيشوفوا الموضوع تافه ومش هيهتموا بس نفسي ابص لنفسي في المراية الاقي كل الحاجات دي اختفت ، او على الاقل ارجع احب شكلي وارضى بيه تاني. مش عارفة إذا حد هيقدر يساعدني ولا لا بس انتوا اسمكم فضفضة وانا حبيت افضفض.

ليست هناك تعليقات